14-anyos dalagita, patay matapos makuryente sa electric heater.

ANTIQUE - Hindi akalain ng pamilya ng 14-anyos na dalagita na ang simpleng pagtimpla ng gatas ang magiging dahilan sa pagkamatay nito matapos makuryente sa ginamit na electric heater.

Ang biktima ay kinilalang si Shanie Ann Hiponia, 14-anyos ng Hamtic, Antique.

Ayon sa kapatid ng biktima na si Paul Vincent Hiponia, inutusan ng kanilang ina ang kanyang kapatid na magtimpla ng gatas.

Nagpakulo umano ito ng tubig gamit electric heater at doon na nakuryente kung saan natumba ito at bumagsak sa kanyang katawan ang heater.

Kaagad na isinugod sa ospital ang biktima subalit hindi na ito umabot na buhay.