Bahagi ng Surigao Norte inulan ng asupre?

Palaisipan pa rin ngayon sa mga residente ng Sitio Usok, Barangay Panataw, sa bayan ng Claver, lalawigan ng Surigao del Norte ang dahilan ng umano'y pag-ulan kahapon ng sulfur o mas kilala sa local term na asupre na kasing laki ng ordinaryong asin .

Sa panayam ng Bombo Radyo Butuan kay Lorelie Abatol, residente ng nasabing lugar, sinabi nito na dakong alas-2:00 ng hapon ay kinuha na nila ang kanilang sinampay na mga damit dahil sa nangingitim na ang kaulapan subalit laking gulat nila dahil hindi naman nabasa ang lupa.

Bagkus mga pira-pirasong parang sulphur na kasinlaki ng butil ng asin ang nakuha umano nila na kulay puti. 

Wala namang amoy at tumagal pa ng hanggang apat na minuto ang pag-ulan.

Nilinaw din ni Lorelie na hindi na nila ito nakuhanan ng litrato dahil mabilis din itong natunaw.

Sinusuri pa ng mga opisyal sa nasabing lugar ang nasabing kaganapan. | via@BomboRadyoButuan